الشرايد تزدّحـم والفكـر صافي
ما بقـى لي غيرترويض الصعيبـه
الهـزل يظهـر وتسفيّـه السـوافـي
والجـزل يبدا شبابه مـن مشيـبه
والأدب وافي وأنـا رجال وافـي
يعتنّي بي كل ما قمـت أعتنّـي بـه
تمشـي الأيّـام وتبـيـن الخوافي
ما لحد صدّه عـن مواجه نصيبه
لي زمان أغفى وأنـا ماني بغافـي
وأبعد الهقوات وتعـوّد قريـبه
الصدور تشاف والا ما تشافـي
والحلوق ترجم النفـس المريبه
ان وقفّت أسرفت وان طحّت متعافي
ما حسبت حساب للذيب وقنيبه
فالدروب وفالبلاد وفالفيافي
مبصر وعميان ربعه تقتدي به
الرجل لا صار يسمع كل هافـي
راحت الدنيا ولا عيّـن صحيبـه
والردا ثوبٍ لجسم اللاش ضافي
والمكارم للرجل حشمه وهيبـه
إحترمت أسمي قبـل طرقـي وقافـي
تربيـة مـن كـل ربعـه تعتـزي بـه
من مشى مـع شلّـة الحافيـن حافـي
لو يمجّد لي علومه ويش أبـي بـه !
ما يسوق الضيق للصدر المجافي
غيرمن يستضعف إللي زاد طيبـه
الأكيد إني ما أحـب أنظـر خلافـي
والغريب إن أغلب العالـم غريبـه
يالسنافي خّـل صاحبـك السنافـي
لا ترد العلـم فيـه ولا تجيـبـه
ذمة الطيّب من الناقـص عوافـي
وذمة الطيّب من الطيّب مصيبـه